जीवन समाजका लागि | सविन प्रियासन

  
  प्रकाशित मितिः बुधबार, भदौ २५, २०७१       | 143 Views   ||

Sabin Priyasanसम्पादक/प्रकाशक, गणतन्त्र दैनिक

पत्रकारिता कहिलेदेखि शुरु गर्नुभयो ?

पत्रकारितालाई नै मुख्य कर्मथलो बनाएर २०५९ सालबाट सुरु गरेको हुँ ।

पत्रकारिता रहरले गर्नुभयो कि आम्दानीका लागि ?

पत्रकारिता आम्दानीभन्दा पनि केही गर्नुपर्छ, गर्न सकिन्छ भन्ने मान्यताका साथ सुरु गरेको हुँ ।

तपाईं त पत्रिका नै चलाएको व्यक्ति अहिलेसम्म कति कमाइ गर्नुभयो ?

कमाइका हिसाबले शुभचिन्तक धेरै मित्रहरु कमाइएको छ । भौतिक सम्पत्तिको कुरा गर्नुपर्दा खासै देखाउन लायक त्यस्तो केही कमाइएको छैन ।

यहाँलाई के लाग्छ पत्रकारिता व्यवसाय कि सामाजिक कार्य ?

दुवै हो । व्यवसाय पनि सामाजिक कार्य पनि ।

सामाजिक क्षेत्रमा पनि तपाईको सक्रियता देखिनु रुचि हो वा समाजका लागि केही गरुँ भन्ने भावना ?

समाजमा केही गर्नुपर्छ भन्ने नै हो ।

तपाईं सक्रिय पत्रकार बन्न चाहनुहुन्छ कि समाजसेवी ?

म दुवै बन्न चाहन्छु । पत्रकार नभएको भए सामाजिक कार्यमा नलाग्न पनि सक्थें । सामाजिक कार्यमा नलागेर जीवन सार्थक पनि हुँदैन ।

बिना आम्दानीको सामाजिक सक्रियताले घरपरिवारमा त खटपट हुन्छ होला नि हैन ?

घरपरिवार चलाउन निश्चित रुपमा आम्दानी हुनुपर्छ । समाजसेवा भन्नेबित्तिकै सबै छाडेर समाजसेवामा होमिनुपर्छ भन्ने होइन । आफ्नो पेशा व्यवसायलाई अगाडि बढाउँदै आफूले गर्ने पेशालाई पनि सामाजिक अभियानसँग जोड्ने उद्देश्यसहित अगाडि बढेमा खासै समस्या आउँदैन ।

श्रीमतीले तपाईं घरव्यवहार सम्हाल्नुस्, म पत्रकारिता र सामाजिक जीवनमा सक्रिय हुन्छु भन्ने प्रस्ताव गर्नुभयो भने तपाईंले के जवाफ दिनुहुन्छ ?

नढाँटेर भन्नुपर्दा यसो हुन सक्दैन । किनकि म पत्रकार हुँ । समाजसेवामा पनि लागेको छु । उहाँलाई पनि यो क्षेत्रमा आउन खुल्ला छ ।

नेता बनेर अरुलाई चलाउन सजिलो कि सदस्य भएर खटिन ?

दुवै कार्य सजिलो पनि छ, अफ्ठ्यारो पनि । यी कुराहरु व्यक्तिको स्वभाव, उसको क्रियाशीलता, चिन्तन, समर्पण र भूमिकामा भर पर्दछन् । मेरो व्यक्तिगत स्वभावमा भन्नुहुन्छ भने म नेतृत्व गरेर सबैलाई समेट्न पनि सकेको छु, सदस्य भएर क्रियाशील बनेर सहयोग पनि गरेको छु ।

दिनमा कति समय फेसबुक र अन्य सामाजिक सञ्जालसँग अपडेट हुने गर्नुहुन्छ ?

दिनमा ठ्याक्कै यति समय भन्ने त छैन । तर धेरै नै अपडेट हुन्छु ।

पत्रकारिताबाट आफूले समाजलाई के दिइरहेको छु जस्तो लाग्छ ?

पत्रकारिताबाट समाजलाई व्यक्तिगतरुपमा धेरै कुरा दिएजस्तो लाग्छ । पूर्णरुपले पत्रकारितामै क्रियाशील भएर आफ्नो सिङ्गो जीवन समाजका लागि दिने सोच बनाएको छु ।

पत्रकारिता क्षेत्रलाई मर्यादित र उत्तरदायीपूर्ण बनाउन के गरिनुपर्छ ?

पत्रकारितालाई मर्यादित र उत्तरदायीपूर्ण बनाउन सर्वप्रथम सबैले आ–आफ्नो भूमिका, दायित्व, कर्तव्य र उद्देश्यलाई नजिकबाट बुझ्ने र व्यवहारमा उतार्ने काम गर्नुपर्छ ।

Leave a Reply

Your email address will not be published. Required fields are marked *