आफ्नो संस्कृति र प्रकृतिमा रमाइरहेको पर्यटकीय गाउँ घलेगाउँ

  
  प्रकाशित मितिः आइतवार, मंसिर १४, २०७१       | 308 Views   ||

ghalegaun 1अजयदीप शर्मा
घलेगाउँबाट फर्केपछि

समुन्द्री सतहदेखि २ हजार १ सय मिटर अग्लो टापुमा रहेको घलेगाउँ लमजुङ जिल्लाको उत्तरकन्या गाविसमा पर्छ । गुरुङ संस्कृति भरिएको सात सय बर्ष पुरानो इतिहास बोकेको घलेगाउँ प्रकृतिको अनुपम सुन्दरताले सिङ्गारिएको छ । अग्ला–अग्ला रमणीय पहाडहरु छिचोल्दै पुगिने घलेगाउँ सदरमुकाम बेशीसहरबाट २४ किमि उत्तरमा पर्ने भए पनि साँघुरो र खराब बाटोका कारण गाडीमा घण्टौं लामो यात्रा गनुृपर्ने हुन्छ ।

परम्परागत घाटु, कृष्णचरित्र र सोरठी नाचले घलेगाउँको गुरुङ संस्कृतिलाई झल्काउँछ भने एकैपटक दृश्यावलोकन गर्न सकिने हिमश्रृंखलाहरु माछापुच्छ, धौलागिरी, अन्नपूर्ण, मनास्लु, बुद्ध हिमाल र लमजुङ हिमालले सधैं घलेगाउँलाई पहरा दिइराखेका जस्तो लाग्छन् । जुन हिमश्रृंखलाका पहराहरुलाई आँखा नथाकुञ्जेल नियालेर पर्यटकहरुले मन आनन्दित बनाउने गर्छन् ।

ghalegaun 3सार्क राष्ट्रको नमुना ग्रामीण पर्यटन गाउँको रुपमा विकसित घलेगाउँमा १ सय २० घर रहेका र ती मध्ये धेरैजसो घरमा होमस्टे रहेको छ । जहाँ हरेक दिन पुग्ने पर्यटकहरु पाहुनाको रुपमा ती होमस्टेमा बस्ने गर्छन् ।  पारीवारिक वातावरण, न्यानो सत्कार र संस्कृतिमा रमाउँदै होमस्टेको आनन्द बसाइमा प्रकृतिसँगको मज्जा दिलाउन सक्ने विशेषता घलेगाउँले बोकेको छ ।

बेशीसहरबाट शिखरको गाउँ घलेगाउँ उक्लिदै गर्दा तल बेशीसहर भने रमणीय देखिदै जान्छ । मिदिम र मस्र्याङ्दी नदीको नागबेली दृश्य नियाल्दै खर्सु र कटुसका बनघारीबाट उच्चिदै जाँदा आकाशको जून छुन जान थालेको जस्तो अनुभूति हुने गर्छ ।

बेशीसहरबाट बिम्दाबेशी, पुमागाउँ, बाग्लुङपानी हुँदै जब पहाडमाथिको टापु बस्तीमा पुगिन्छ तब आनन्दै, आनन्दको स्वर्णिम अनुभूति मान्छेका मनले गर्न थाल्छन् ।

घलेगाउँमा पुग्ने पाहुनाहरुलाई आफ्नो संस्कृतिअनुसारको पहिलो स्वागतपछि माहोललाई संस्कृतिमय बनाउन थालिन्छ । गुन्द्रुकको अचार, भट्ट र मकैको खाजा खाँदै हेरिने कृष्ण चरित्र, सोरठी नाच र घाटु नाचका दृश्यहरुले पर्यटकलाई आनन्द र भावुक गराउँछन् ।

ghalegaun 4हिमालका हिमश्रृंखलाजस्तै स्वच्छ र सफा मनका त्यहाँका मान्छेहरुको सत्कार र माया बिर्सन नसकिने हुन्छ । कोदो र फापर मिसाएर बनाएको सेल बोडी र आलु तरकारीको नास्ता अनि च्याङ्ग्राको मासु र भात त्यहाँ पुग्ने अतिथिहरुलाई खुवाउने खाना हो ।

अतिथिहरुको पहिलो स्वागत ‘पा’ याने कि घरमा बनाएको कोदोको रक्सी हुन्छ, जो एक थोपा भए पनि उनीहरुको खुसीका लागि खाइदिनुपर्ने हुन्छ । साँझको समय घलेगाउँ बासीहरुको मिठो आत्मीयतालाई अंगाल्दै सुतेपछि बिहान उठ्नासाथ प्रकृतिले  निकै मनमोहक दृश्यहरु देखाएर पाहुनाहरुको स्वागत गर्ने गर्छ ।

घलेगाउँसँगै उठ्दा बिहान सूर्योदयको दृश्य, भेडीगोठहरुमा च्याङ्ग्राहरुको बथान, चिया बगान, तिलिज ताल, भिरमौरी आदि अन्य वृक्षका दृश्यहरुले आँखाभरि उमङ्ग भरिदिन्छन् । घलेगाउँको प्राकृतिक सुन्दरता र लोभलाग्दा संस्कृतिका भण्डारहरुलाई आँखाभरि सजाएर फर्किदा मान्छेहरुलाई एक किसिमको सन्तुष्टि र घलेगाउँ पुग्न पाएकोमा गर्वको महशुस हुने गर्छ ।

घलेगाउँ, दुर्गम ठाउँमा रहेको गुरुङहरुको आदि कालदेखिको गाउँ हो । तर यसले पर्यटन प्रर्वद्धन २०५७ सालदेखि गर्न थालेको त्यहाँका अध्यक्ष प्रेम घले बताउनुहुन्छ । गाउँका युवाहरु सबै विदेशिन थालेपछि उनीहरुलाई रोक्नका लागि ०५७ सालमा घलेगाउँ महोत्सव शुरु गरी पर्यटन व्यवसायको शुरुवात गरिएको घले बताउनुहुन्छ ।

ghalegaun 2अहिले घलेगाउँका बासिन्दालाई परिवार पाल्न र बच्चाहरु पढाउनका लागि पैसाको कुनै समस्या नभएको उहाँ बताउनुहुन्छ । कुनै ठाउँको विकास र प्रवद्र्धनका लागि सञ्चार याने कि प्रचारको भूमिका महत्वपूर्ण हुने भन्दै त्यो घलेगाउँलाई यो स्थानसम्म ल्याउने काम सञ्चारले नै गरिदिएको उहाँ बताउनुहुन्छ ।

अहिले घलेगाउँ आन्तरिक र बाह्य पर्यटकहरुले भरिएको हुन्छ । घलेगाउँबासीका लागि होमस्टे नै अहिले आम्दानीको मुख्य स्रोत बन्न थालेको छ । घलेगाउँको जति प्रचार भएर पर्यटकहरु जाने गरेका छन्, त्यहीअनुसार सरकारले त्यहाँको पक्कीे मोटरबाटो निर्माणमा ध्यान दिने र अन्य पूर्वाधारका लागि बजेट छुट्याउने हो भने घलेगाउँ साँच्चिकै सार्क राष्ट्रको सुन्दर र नमूनायोग्य पर्यटकीय गाउँ बन्नेछ ।

One Comment

  • Sarita

    घले गाउको समाचार पढ्न पाउदा खुशी लाग्यो र साथ साथै घले गाउलाई आजको यो अवस्थामा ल्याईपुराउनको लागी दीनरात नभनी गाउबासिको लागि मेरो बाबा सुदर्शन प्रधान ले सुरुवाती दिनहरुमा गरेका काम हरुको याद फेरी ताजा भयर आयो । तर अहिले वाहाको नाम कही कतै नाआयको देख्दा भने कता कता दुख्ख लगेर आयो ।
    नेपालीमा एउटा उखान छ नि “काम गर्ने कालु ,मकै खाने भालु ” हो त्यस्तै लाग्यो यहाँ प्रेम घले ज्यु को नाम जोडीयको देखेर । मेरो अर्थ को अनर्थ नलगाउनु होला लेखक ज्यु तर मलाई लाग्छ कि कुनै पनि कुरा बाहिर ल्याउनु भन्दा अगाडि त्यस बारे अध्यन अनुसन्धान भयमा कसैलाई पनि आन्यय नहोला कि ….

Leave a Reply

Your email address will not be published. Required fields are marked *