घाम ताप्दै गफिए प्रचण्ड र ओली

  
  प्रकाशित मितिः बुधबार, पुस १२, २०७४       | 388 Views   ||

सरकार गठन, पार्टी एकतालगायतका विषयमा अमलम भइरहँदा माओवादी अध्यक्ष प्रचण्ड र एमाले अध्यक्ष केपी शर्मा वलीबीच ‘वन टु वन’ वार्ता भएको छ ।

उच्च पदस्थ नेताहरुबीच ‘वन टु वन’ हुने कुराकानीको उद्देश्य नै गोप्यताका लागि हो । प्रचण्ड र ओली झण्डै एक हप्तापछि ‘वन टु वन’ कुराकानीमा सहभागी भए, बालकोटस्थित ओली निवासमा ।

तर, गोप्यताका लागि गरिएको ‘वन टु वन’ कुराकानीका लागि चाहिँ दुबै नेताले गोप्य कोठा रोजेनन्, खुल्ला ठाउँ रोजे । दुबै नेता ओलीको घरको पहिलो तल्लाको कौसीमा गए, घाम तापेर चिया खाँदै झण्डै सवा घण्टा गफिए । ओली निवासबाट निस्कँदा पनि प्रचण्ड प्रसन्न मुद्रामा नै देखिए ।

ओली निवासबाट निस्केका प्रचण्ड मात्र होइन, भेटपछि ओलीको सचिवालयले जारी गरेको तस्वीरमा पनि ओली र प्रचण्ड दुबै प्रसन्न मुद्रामा देखिन्छन् । खासमा प्रचण्डको ४ दिने चितवन बसाईंका कारण एमाले–माओवादी सम्बन्धमाथि जुन आशंका सिर्जना हुन पुगेको थियो, त्यो चिर्नका लागि मात्र आजको भेट भएको हो ।

भेटपछि प्रचण्डका प्रेस संयोजक मनहरि तिमिल्सिनाले मूलतः तीन विषयमा दुई शीर्ष नेताबीच कुराकानी भएको बताएका छन् । ती तीन विषय हुन्, पार्टी एकता, सरकार गठन, राष्ट्रिय सभा अध्यादेश । उनले छलफल सौहार्द वातावरणमा छलफल भएको जानकारी दिएका छन् ।

‘छलफलमा जनताले नयाँ जनादेश दिएको परिस्थितिमा वर्तमान सरकारले नयाँ सरकार गठनको मार्ग प्रशस्त गर्नुपर्ने विषयमा उहाँहरु बीच कुराकानी भएको थियो’ तिमिल्सिनाले भनेका छन्, ‘निर्वाचन आयोगले पनि नयाँ सरकार गठनका विषयमा वातावरण सहज बनाउनुपर्ने बारे पनि नेताहरु बीच कुराकानी भएको थियो ।’

तिमिल्सिनाले भनेका छन्, ‘दुई अध्यक्षबीच राजनीतिक वातावरण सहज बनाएर पार्टी एकतालाई अघि बढाउने समझदारी भएको छ । १–२ दिनमै संयोजन समितिको बैठक बोलाएर पार्टी एकताको प्रक्रिया अघि बढाउने पनि प्रचण्ड र ओलीबीच समझदारी भएको छ ।’

Leave a Reply

Your email address will not be published. Required fields are marked *