दाङ — राप्ती स्वास्थ्य विज्ञान प्रतिष्ठानले बाहिरका निजी अस्पताल वा क्लिनिकका चिकित्सकबाट सिफारिस लिएर आउने बिरामीका लागि नयाँ सुविधा लागू गरेको छ। अब यस्तो सिफारिससहित आउने बिरामीले एमआरआई, सिटि स्क्यान लगायतका परीक्षणका लागि सिधै बिलिङ गरेर सेवा लिन सक्नेछन्।
प्रतिष्ठानका निमित्त अस्पताल निर्देशक प्रा.डा.जनार्दन पन्थका अनुसार,बिरामीले अब पुनः ओपीडी पर्चा काटेर लाइनमा बस्नुपर्ने बाध्यता हटाइएको हो। बाहिरका चिकित्सकको सिफारिस अनुसार सुगर,प्रेसर लगायतका परीक्षण सेवासमेत सिधै बिलिङ प्रणालीबाट उपलब्ध हुने व्यवस्था गरिएको उनले बताए। यो नयाँ प्रणाली लागू भएपछि बिरामीको समय र झन्झट दुबै घट्ने तथा सेवा सहज र प्रभावकारी हुने अपेक्षा गरिएको छ।
