तुलबहादुर कवंँर मगर
मसुरिया,दाङको राप्ती गाउँपालिकामा योगदानमा आधारित सामाजिक सुरक्षा कोषसम्बन्धी एकदिने अभिमुखीकरण कार्यक्रम मंगलबार सम्पन्न भएको छ।राप्ती गाउँपालिकाको आयोजनामा र सामाजिक सुरक्षा कोष सम्पर्क कार्यालय बुटवलको प्राविधिक सहयोगमा उक्त कार्यक्रम सम्पन्न भएको हो।
कार्यक्रममा बोल्दै राप्ती गाउँपालिका अध्यक्ष प्रकाश विष्टले जीवनमा आउने आर्थिक जोखिमबाट सुरक्षित रहन सामाजिक सुरक्षा कोष एक महत्वपूर्ण माध्यम भएको बताउनुभयो। उहाँले आगामी आर्थिक वर्षदेखि औपचारिक तथा अनौपचारिक क्षेत्रका कर्मचारी र श्रमिकलाई कोषमा आबद्ध गराउने लक्ष्य रहेको स्पष्ट पार्नुभयो।
सामाजिक सुरक्षा कोष सम्पर्क कार्यालय बुटवलका प्रमुख केदार पौडेलले कोषको नीतिगत व्यवस्था, दर्ता प्रक्रिया, योगदानकर्ताका अधिकार र कर्तव्यहरू, तथा कोषमार्फत प्राप्त हुने विभिन्न सुविधाहरूको विस्तृत जानकारी दिनुभयो।
उहाँका अनुसार औपचारिक क्षेत्रका करार तथा ज्यालादारी श्रमिकहरूको तलबको कम्तीमा ६० प्रतिशतलाई आधारभूत तलब मानी त्यसको २० प्रतिशत रोजगारदाताबाट र ११ प्रतिशत श्रमिक आफैँले योगदान गर्ने व्यवस्था रहेको छ। अनौपचारिक क्षेत्रका श्रमिकहरूले न्यूनतम आधारभूत पारिश्रमिकको ११ प्रतिशत योगदान गर्नुपर्नेछ भने ९.३७ प्रतिशत सरकारले व्यहोर्ने व्यवस्था गरिएको छ।
यसैगरी स्वरोजगारमा रहेका व्यक्तिहरूले कम्तीमा न्यूनतम आधारभूत पारिश्रमिकदेखि अधिकतम त्यसको तीन गुणासम्मको आधारमा ३१ प्रतिशत योगदान गर्नुपर्ने छ। कोषमार्फत श्रमिकहरूलाई औषधि उपचार,स्वास्थ्य तथा मातृत्व सुरक्षा योजना, दुर्घटना तथा अशक्तता सुरक्षा योजना, आश्रित परिवार सुरक्षा योजनार वृद्धावस्था सुरक्षा योजना उपलब्ध गराइने जानकारी दिइएको थियो। कार्यक्रममा राप्ती गाउँपालिकाका प्रमुख प्रशासकीय अधिकृत देवीराम पाठकले सामाजिक सुरक्षा कोषले नागरिक सुरक्षाको दायरा विस्तार गर्न महत्त्वपूर्ण भूमिका खेल्ने धारणा राख्नु भयो।
कार्यक्रममा पालिकाका उपाध्यक्ष कमलापती चौधरी,कार्यपालिका सदस्यहरू,कर्मचारी,विभिन्न व्यवसायी तथा संघ–संस्थाका प्रतिनिधिहरूको उल्लेख सहभागिता रहेको थियो।
सहभागीहरूले कोषप्रति चासो व्यक्त गर्दै यसको प्रभावकारी कार्यान्वयनका लागि विभिन्न सुझावहरू समेत प्रस्तुत गरेका थिए।
